#RandomThought 2: توازن!

عارفة كويس ان سر الحياة في التوازن. التوازن بين واجبتنا و اللي احنا عايزين نعمله، الواقع و الاحلام، التوازن بين التمتع بالدنيا و الترفيه عن نفسنا و بين اننا نعرف الحكمة من وجودنا في الحياة، احنا مين و عايزين نحقق ايه و نضالنا ان يكون لحياتنا معنى و تأثير.. و التوازن بيساعدنا اننا نفضل على طريقنا الصح اللي اختارناه لنفسنا و اللي بيحقق رضانا عن حياتنا العملية و الروحية و الاجتماعية..

انا مقتنعة ان من اهداف و مقاصد الاسلام اننا نحقق التوازن في نفسنا و حياتنا حتى في المجتمع و بين الطبقات و الجماعات المختلفة، في العالم و الكون و مدى استفادتنا من غيرنا من الامم و البيئة و برضه تأثيرنا عليهم..

على قدر اقتناعي بأهمية ايجاد التوازن في حياتي و تحقيقه الا اني بالتجربق عارفة ان تحقيقه صعب! لأنه بيتطلب تحكم في نفسنا بكسلنا و انجرافنا ورا السهل، و ورا الناس، و كمان تحكم في رغباتنا و عادتنا اللي لازم نتخلص منها... رغم ان كتير بتكون عادات بنحبها و مسيطرة علينا بس برضه عارفين ان بوجودها مش هنحقق التوازن و مش هنوصل للعايزينه

كل فترة اكتب لنفسي نقط و بنود لروتين يومي بسيط. قراءة... كتابة افكاري.. تسبيح مثلا.. مشي لمدة معينة.. الخ! مع ذلك مستمرتش و لا مرة و لا كملت.. متأكدة ان عدد المرات اللي عملت كده غير محدود! و قبل كل مرة اشتغل تقطيم في نفسي على المرة اللي قبلها! و لكن ده لم يمنعني اني اكتب تاني و تالت و عاشر لنفسي البنود ،سواء نفسها او متغيرة، و احاول اطبقها و استمر، لأن جوايا ايمان اني لو مفضلتش احاول اعمل الحاجات اللي بحبها، و اني انجز، و احقق التوازن في حياتي و اهدافي يبقى عمري ما هوصل!

عارفة ان أخطائي كتير و نضالاتي مع نفسي طويلة مع ذلك ثمن الاستسلام و الرضوخ لنفسي مقدرش اتحمله... و مؤمنة ان الحياة سلسلة محاولات في سيبل ان تنجح احداها او ان يتحقق شئ مع كل محاولة.